Павлодар облысында жүктілік туралы жалған медициналық анықтаманы пайдалану фактісі анықталды, деп хабарлайды Arnapress.kz ҚР Бас прокуратураға сілтеме жасап.
Аталған құжат мас күйінде жол-көлік оқиғасын жасаған әйелге әкімшілік қамақтан жалтаруға мүмкіндік берген.
Прокуратура жүргізген тексеру барысында анықтаманың жалған екені анықталып, нәтижесінде сот әйелді 20 тәулікке әкімшілік қамаққа алды.
Жалған медициналық құжатты рәсімдеуге байланысты пара алу және дәлелдемелерді бұрмалау фактілері бойынша кінәлі тұлға сотталды. Сот шешімімен оған 6,6 млн теңге көлемінде айыппұл салынды. Сонымен қатар ол мемлекеттік қызметте лауазым атқару құқығынан өмір бойына айырылды.
Прокуратура жалған медициналық құжаттың пайдаланылуына жол берген себептер мен жағдайларды зерделеді.
Прокурорлық қадағалау актісі негізінде 5 лауазымды тұлға, оның ішінде 2 басшы қатаң тәртіптік жауапкершілікке тартылды.
Қабылданған шаралардың нәтижесінде медициналық ұйымдарда құжаттарды рәсімдеу, есепке алу, сақтау және беру тәртібіне бақылау күшейтілді.
Сондай-ақ медициналық құжаттардың электрондық нұсқаларына өзгеріс енгізу мүмкіндігі жойылды.
Осылайша, прокуратура анықталған фактіге қылмыстық-құқықтық баға берумен қатар, жалған медициналық құжаттарды пайдалануға мүмкіндік берген себептер мен жағдайларды жоюды қамтамасыз етті.
Фото: ЖИ
