Жетісудың "Бақторы" атты жүйрігі 2023 жылы Ақсуатта өткен 140 шақырымдық аламан бәйгеде 6 сағат 12 минутта мәре сызығын кесіп өткен болатын. Ал, биыл бұл нәтиже ресми түрде тіркеліп, жүйрік әлемдік рекорд иегері атанды, деп хабарлайды Arnapress.kz тілшісі
Алтай мен Атырау, Қордай мен Торғайдың арасындағы аузында өлеңі, астында жүйрігі бар жұрт Тарбағатайға аламан бәйгеге ағылды. 140 шақырымдық аламан бәйге, 40 мемлекеттен жиылған апайтөс палуандар, арысы Өзбек пен Қытай, Моңғол мен Қырғыздан келген суырыпсалма ақындар, қазақ эстрада жұлдыздары Ақсуат өңірін үш күн бойы мейрамға бөлеген еді.
Аталған бәйгенің ұйымдастырылу тарихы мен маңыздылығы жөнінде шара ұйымдастырушысы кеңінен баяндап өтті
"Қазақтың қазанаттарымен ұлы аламан ұйымдастыру бұрыннан ойда жүрген жағдай еді. 1000, 2000 метр қашықтықта шабатын ағылшын жылқыларын дәріптеп, өзіміздің қазанаттарды, нағыз өзіміздің қазақтың аттарын дәріптеу кейінге қалып қалғандай еді. Міне, осыны қолға алып, рухын көтеру ойымызда жүр еді. Осы шара аясында біз аламан жарысты ұйымдастырып, 140 шақырымдық бәйгелерді таңдап алып, Көкпекті мен Ақсуат арасы сондай ара қашықтықта, соны белгілеп алып, қазақтың қазанаттарын шаптырдық. Бұндай қашықтыққа көрінген аттар шаба бермейді. Оған төзімді, мықты, нағыз қазақтың қазанаттары шабады. Үш жыл қатарынан ұйымдастырдық. Бірінші жылы, жетісулық "Қызжирен" деген ат 7 сағат 30 минутта жетті, екінші жылы Қатонқарағайдың "Тарпаңторысы" 7 сағат, 40 минутта келсе, үшінші жылы Жетісудың "Бақторысы" 6 сағат, 15 минутта мәре сызығын қиып өтті. Әлемдік сайттар жарыса жазып жатты сол кезде. Осылардың бәрін заңдастырып, потент алдық. Әлемдік рекорд сынағына ұсыныс тастадық, олар тексеріп, қарап, зерделеп, айғақтарды қарап, әлемдік рекордқа енгізді. Әлемдік деңгейде Астана қаласында 2026 жылдың 27 ақпанда ұйымдастырушы ретінде халықаралық премия, сертификат, әлем рекордсмені деген атақтармен марапатталдық. Ақсат елінің, халқының еңбегі бұл. Сенген, артымнан ерген жандарға өз атымнан рахмет айтқым келеді. Ұйымдастыру кезінде көптеген қиыншылықтар да орын алған еді. Көре алмаушылықтар да болып жатты. Солардың бәрін елемей, жеңіп міне, осындай дәрежелерге жетіп жатырмыз. Бүкіл әлемге танылдық, қазақтың қазанаттарын әлем аттарымен терезесі тең дәрежеде. Бұл керемет жетістік. Биылғы жылқы жылы бәйгемен жеңіспен бастап жатыр, қазақ елін осы жеңіспен құттықтаймын”, - дейді ұйымдастырушы, Шығыс Қазақстанның құрметті азаматы, құрмет орденінің иегері, Ел ағасы, меценат Баделхан Камалханұлы.
Айта кетейік, Ақсуатта өткен 140 шақырымдық аламан бәйге қазақтың қазанаттарын қайта жаңғыртып, ұлттық ат спортының әлеуетін әлемдік деңгейде танытқан айтулы оқиғаға айналды. Бұл бәйге – тек спорттық жарыс емес, қазақ халқының тарихы, рухы мен жылқы мәдениетінің биік көрінісі. Ұлы даланың жүйріктері әлемдік рекордтар қатарынан көрініп, ұлттық құндылықтардың жаңаша бағалануына жол ашты.
Гүлнұр Ахметжан
Фото: Баделхан Камалханұлы
