Лента новостей

Құрылтайда 2027-2029 жылдарға арналған бюджет шығыстары қайта қаралды

бюджет, жалақы, Құрылтай

Құрылтай "2027–2029 жылдарға арналған республикалық бюджет туралы" заңды екінші оқылымда мақұлдап, үшінші оқылымда қабылдады. Құжаттың бірінші оқылымы биыл 14 қазанда өткен болатын, деп хабарлайды Arnapress.kz Құрылтайға сілтеме жасап.

Жаңа бюджетте әлеуметтік бағыттылықты сақтау басты назарға алынған. Атап айтқанда, барлық бюджет қаражатының үштен бірінен астамын адами капиталды дамытуға және азаматтар алдындағы әлеуметтік міндеттемелерді орындауға жұмсау жоспарланып отыр. Сонымен қатар өңірлік инфрақұрылымды жаңғыртуға және экономиканың нақты секторын қолдауға қаражат бөлінеді.

Заң жобасын талқылау барысында депутаттар 2027 жылы Мемлекет басшысының тапсырмаларын орындауға бағытталған бірқатар түзетуді қолдады.

Атап айтқанда, 114,1 миллиард теңге Президенттің 2026 жылғы 28 қазандағы Жолдауында жарияланған бастамаларды жүзеге асыруға бағытталады. Оның ішінде ең төменгі жалақыны 110 мың теңгеге дейін көтеру, алғашқы медициналық-санитарлық көмек қызметкерлерінің жалақысын арттыру және орта білім беру саласына жасанды интеллектіні енгізу бар.

Ал 101,5 миллиард теңге Мемлекет басшысының нақты тапсырмаларын орындауға, соның ішінде Сәтбаев атындағы каналдан Астанаға дейін су құбырын тартуға және "Балқаш" атом электр станциясы жобасы бойынша геологиялық барлау жұмыстарын жүргізуге қарастырылған.

Бұдан бөлек, республикалық бюджет қаражатының тиімділігін арттыру мақсатында мемлекеттік органдар арасында 135,5 миллиард теңге қайта бөлінді.

Қабылданған заң орта мерзімді кезеңде экономикалық өсімді қамтамасыз етуге, халықтың әл-ауқатын арттыруға және елдің қаржылық тұрақтылығын нығайтуға бағытталған.

Фото: Жасанды интеллект арқылы

Просмотров (80)