Павлодар облысының прокуратурасы сотталғандардың еңбекпен қамтылу көрсеткіштерін қолдан арттыру фактілерін анықтады, деп хабарлайды Arnapress.kz Бас прокуратураға сілтеме жасап.
Талдау барысында есептілікке іс жүзінде жұмыс істемеген және олармен еңбек шарттары жасалмаған сотталғандардың енгізілгені белгілі болды.
Мәселен, қылмыстық-атқару жүйесі мекемелерінің бірінде еңбекке қабілетті 855 сотталғанның 494-і жұмысқа орналастырылған деп көрсетілген. Алайда зейнетақы аударымдары мен әлеуметтік төлемдер туралы мәліметтерді тексеру нәтижесінде олардың тек 205-і ғана іс жүзінде жұмысқа орналасқаны расталған.
Осылайша, 289 сотталған жұмысқа орналастырылмаған, ал еңбекпен қамту көрсеткіші 2,5 есеге артық көрсетілген.
Прокуратура мәліметінше, жалған жұмысқа орналастыру "Еңбек-Павлодар" филиалының бұйрықтарымен рәсімделген.
Сонымен қатар, сотталғандарды жұмысқа орналастыру жұмысының тиісті деңгейде ұйымдастырылмағаны анықталған бұзушылықтарға себеп болған.
Прокуратураның ұсынуын қарау қорытындысы бойынша кінәлі лауазымды тұлғалар тәртіптік жауапкершілікке тартылды.
Фото: Жасанды интеллект арқылы жасалды
