2026 жылдың алғашқы 9 айында Қазақстанда профилактикалық онкологиялық скринингтер нәтижесінде қатерлі ісіктің 3 016 жағдайы анықталды. Бұл өткен жылдың сәйкес кезеңімен салыстырғанда 62%-ға жоғары, деп хабарлайды Arnapress.kz ҚР Денсаулық сақтау министрлігіне сілтеме жасап.
Анықталған жағдайлардың ішінде:
Сүт безі обыры – 2 049 жағдай;
Колоректальдық обыр – 590 жағдай;
Жатыр мойны обыры – 377 жағдай.
Сондай-ақ обыралды аурулардың 5 295 жағдайы анықталды. Бұл көрсеткіш те өткен жылмен салыстырғанда 57%-ға артқан.
Ерте диагностиканың маңыздылығы да артып келеді: I сатыда анықталған онкологиялық аурулардың үлесі 70,3%-дан 71,6%-ға дейін өсті.
Жалпы, 2026 жылдың 9 айында еліміз бойынша 3,23 миллионнан астам адам онкологиялық скринингтен өтті. Бұл тексеруден өтуі тиіс халықтың 57,1%-ын құрайды.
Қазіргі таңда Қазақстанның 20 өңірінде орталықтандырылған скрининг модельдері енгізілген. Сонымен қатар қатерлі ісікке күдік туындаған жағдайда пациенттерді қосымша тексерулерге жедел бағыттауға арналған «жасыл дәліз» жүйесі жұмыс істейді.
Фото: Жасанды интеллект арқылы
