Міндетті зейнетақы жарналарының сақталуына берілетін мемлекеттік кепілдік толық көлемде сақталады, деп хабарлайды Arnapress.kz ҚР Еңбек және халықты әлеуметтік қорғау министрлігіне сілтеме жасап.
Бұл норма Қазақстан Республикасының Әлеуметтік кодексінде бекітілген және оған ешқандай өзгеріс енгізілмейді.
2027 жылдан бастап мемлекеттік кепілдіктің өзі емес, заңнамада көзделген өтемақы төлеу тетігі өзгереді. Өзгерістер жинақтаушы зейнетақы жүйесін жетілдіруге және азаматтардың зейнетақы жинақтарын басқару мүмкіндіктерін кеңейтуге бағытталған.
Қазіргі таңда азаматтар өздерінің зейнетақы жинақтарының 100 пайызына дейін инвестициялық портфельді басқарушы компаниялардың сенімгерлік басқаруына бере алады. Бұрын бұл мүмкіндік жинақтардың 50 пайызына дейін ғана болған.
Жаңа тәртіпке сәйкес азаматтар басқарушы компанияны, инвестициялық стратегияны және өздеріне қолайлы тәуекел деңгейін өздері таңдай алады. Сонымен бірге инвестициялық портфельді басқарушыларға қаржылық тұрақтылық, меншікті капиталдың жеткіліктілігі және кәсіби тәжірибе бойынша қатаң талаптар қойылады.
Қазақстан Республикасының Ұлттық Банкі зейнетақы активтерін олардың сақталуын қамтамасыз ете отырып, ұзақ мерзімді табыстылыққа қол жеткізу мақсатында басқаруды жалғастырады.
Осылайша, енгізілетін өзгерістер зейнетақы жүйесін жетілдіруге бағытталғанымен, міндетті зейнетақы жарналарының сақталуына берілетін мемлекеттік кепілдік толық көлемде өз күшінде қалады.
Фото: ЖИ
