Жылы маусымның ерте басталуына байланысты ел аумағында көпқабатты тұрғын үйлердің терезелерінен балалардың құлап кету фактілері тіркеліп отыр, деп ескертеді Arnapress.kz Қазақстан Республикасының Бас прокуратурасы баспасөзіне сілтеме жасап.
Мамандардың айтуынша, мұндай қайғылы жағдайлардың негізгі себебі – ересектер тарапынан бақылаудың жеткіліксіздігі.
Тәжірибе көрсеткендей, балалар көбіне қысқа уақытқа қараусыз қалған сәтте терезе маңына шығып кетіп, қауіпке тап болады. Бұл ретте москиттік торлардың да қосымша қауіп төндіретіні ескертіледі, себебі олар баланың салмағын көтеруге арналмаған.
Ақпараттық-түсіндіру жұмыстарына қарамастан, мұндай оқиғалар жыл сайын қайталануда. Осыған байланысты мемлекет тарапынан бірқатар заңнамалық талаптар енгізілген.
Атап айтқанда, «Қазақстан Республикасындағы сәулет, қала құрылысы және құрылыс қызметі туралы» заңнамаға сәйкес жаңа тұрғын үйлерде терезелерді қауіпсіздік құлыптарымен және арнайы механизмдермен жабдықтау міндеттелген. Сонымен қатар, «Тұрғын үй қатынастары туралы» заң аясында пәтерлердегі қауіпсіздік шараларын қамтамасыз ету көппәтерлі үйлерді басқарушы ұйымдардың құзыретіне кіреді.
Дегенмен, мамандар негізгі қауіп факторы – адами жауапкершілік екенін айтады.
Осыған байланысты Бас прокуратура ата-аналарға қарапайым, бірақ маңызды қауіпсіздік ережелерін қатаң сақтауға шақырады:
– балаларды қараусыз қалдырмау;
– терезе маңына жиһаз қоймау;
– терезелерге арнайы блокираторлар орнату;
– баланың терезеге өздігінен шығу мүмкіндігін болдырмау.
Кәмелетке толмағандардың қауіпсіздігін қамтамасыз ету бойынша міндеттерді орындамаған жағдайда заңнамаға сәйкес әкімшілік жауапкершілік қарастырылған. Соңғы үш айдың өзінде осы бап бойынша мыңдаған ата-ана мен заңды өкіл жауапқа тартылған.
Бас прокуратура балалардың өмірі мен денсаулығы – ең жоғары құндылық екенін еске салып, ата-аналарды барынша қырағылық танытуға шақырады.
Фото: ЖИ
