Қазақстан Республикасы Ұлттық экономика министрлігі такси тасымалдаушыларға қатысты хабарлама беру ережесіне өзгерістер енгізді, деп хабарлайды Arnpress.kz министрлікке сілтеме жасап.
Енді такси қызметін жүзеге асыратын тұлғалар жұмысты бастамас бұрын міндетті түрде жергілікті атқарушы органға хабарлама жолдауы тиіс.
Жаңартылған талаптарға сәйкес, тасымалдаушылар көлік құралдарына қатысты мәліметтерді нақты көрсетуге міндеттеледі. Атап айтқанда, хабарлама нысанына көліктің маркасы, мемлекеттік тіркеу нөмірі және шығарылған жылы енгізіледі. Сонымен қатар, автопарк жаңартылған жағдайда - яғни жаңа көлік қосылғанда немесе көлік ауыстырылғанда - тиісті өзгерістерді енгізу мүмкіндігі қарастырылған.
Бұған дейінгі тәртіп бойынша тасымалдаушы нақты бір көлікке бекітілмейтін. Бұл жол-көлік оқиғалары кезінде жауапты тұлғаны анықтауды қиындатқан. Жаңа өзгерістер осы олқылықтың орнын толтыруға бағытталған.
Мамандардың айтуынша, енгізілген жаңашылдықтар жолаушылар тасымалы саласындағы қауіпсіздікті арттырып, заңсыз қызмет көрсететін такси үлесін азайтуға мүмкіндік береді. Сонымен қатар, апат жағдайында жауапты тасымалдаушыны жедел анықтауға жол ашады.
Аталған өзгерістер Қазақстан Республикасы Ұлттық экономика министрінің 2015 жылғы 6 қаңтардағы №4 бұйрығына енгізілген толықтырулар аясында қабылданды.
Фото: ЖИ
